Wie's ganz genau ohgfange* hat, waiß koiner meh so genau. Awwer es gibt welche, die behaupte steif unn fescht, dass de Little unn de Rainer beim Ed Isenmann än seim Club an de Theek g’sesse sinn unn gude Sache getrunke henn. Des muss wohl so um 1978 g’west sei. Dodebei isch de Uwe däzukumme, der aah immer gern gude Sache gedrunke hat. 
          Unn weil die drei sich sowieso immer Freidags uffem Michelsberg getroffe henn, henn se gedenkt, sie könnte sich aah Mittwochs beim Rainer zum Musichmache treffe.

          Korz druff sinn dann noch de Joe Geider unn de Hans-Werner Werth däzukumme unn de Joe hat g’sagt, das isch jetzt die HEIZÖLBÄND. Die annere henn des aah gleich eig’sehe, denn wer will denn schunn "Wärmepumpe" odder "Sonnenkollektor" haiße.

          * Uff Bruslerisch schpricht man des "O" bei "Ohgfange" wie en offenes O (so wie bei Torte, Lord, Wort, Ort) 

Des war die allererschde Heizölbänd mit (vunn links) Uwe, Rainer, Joe Geider, Hans-Werner Werth unn Little. So um 1980 rum beim Kosmosophische Verein en Kallsruh...

Es waiß widder koiner meh so genau, awwer irgendwann 1981 wollte de Joe unn de Hans-Werner meeh Kunscht unn die annere Heizöler meeh Heizöl. So sinn dann de Check unn de Thommi däzu kumme. 

Unn des war dann die nägschd Heizölbänd mit (vunn links) 
Tommi, Uwe, Little, Rainer unn Check. So um 1982 rum en Bellem...

Später henn sich die Jungs noch d’Helga Thomé als Flötenspielerin unn Trommlerin däzug’holt unn de Jürgen Groh hat sich um die Technik gekimmert. Unn g’heiert henn d’Helga unn de Jürgen aah noch...

1999 war dann des große Jahr der Boy-Groups. Unn weil die Heizöler immer mit de Zeit gehn unn solche Strömunge gleich uffnemme, schpielt seitdem en gewisser Norbert Blasius (genannt Nopfl) des Schlagzeig bei de Heizölbänd.